schwoazz

[Ric]

- - - (so hat alles angefangen - und ein ende gefunden)

schwoazz is die nocht   und i bin ned bei dia
und i kaonn nix dafia   hob nua gsungan und glocht
und so laod woa de nocht   volla schpaß und bahöö
und i hob meinersöö    kan gedaonkn mia gmocht

und so bunt woa die nocht   und die wangaln hom gliad
und a handerl beriad   gaonz vastoen   und gaonz socht
und so schwüü woa die nocht   und beim taonz hob i gschpiad
dass heid gwiiß wos passiad    in dea haamlichn nocht

und so haaß woa die nocht   und wea hod ween vafiad
und sie hod si ned ziad   kane umständ ned gmocht
meingood schwoazz is die nocht   es is boed in da friah
und i bin ned bei dia   Herrgott   wos hosd denn gmocht

und so gschwind is die nocht   und da wogn fliagd dahii
dass i boed bei dia bii         daon hod s fiachtalich krocht

volla leut    is die nocht   umadum    a radau
und a liacht   zuckt so blau   um mi wiad s wieda nocht

und so schwoazz is die nocht    und i bin ned bei dia
und i kaonn nix dafia    hob nur gsungan und glocht

und so fiachtalich schwoazz     und so schtüü    is die nocht  
neamma gsungan  und glocht   und so schwoazz   is die nocht